Haʻiʻōlelo a Vonutavaua Vuta:

ʻAuhea ʻoukou e ka hoʻokalakupua polohīnano o Puna, nā kupu, nā ʻeu, nā luhi o ka paia ʻaʻala, aloha pumehana mai kākou.

ʻO ka hiʻipēpē ka mua, ma hope ka Pūnana Leo, a hoʻomau ma Nāwahī. He pilina ko mākou me ko ke kula a me ke kaiapuni hoʻōla ʻōlelo Hawaiʻi. Ua hoʻomaka kekahi ʻelele o ka ʻohana i ka ʻiʻini no ka hoʻōla ʻōlelo Hawaiʻi a ma muli o ka ʻohana, e lilo ana mākou he mau luhi. Ma muli o nā hoa pili, nā kumu aʻo, nā kumu kākoʻo, nā lima hana nui, a me nā mākua i komo ma ka hana no mākou, ua eo ka lanakila iā kākou, ʻonipaʻa ka hana, ʻoi kelakela ka ʻōlelo, a lanakila i ka nani Nāwahī, No ʻAneʻi Ko Kākou Ola. 

E nā luhi, nā pōkiʻi, a me nā hoapapa, he kuleana ko kākou e hoʻomau i ka ʻike a me ka ʻōlelo Hawaiʻi ʻoiai, he mea ʻole ka hana a nā ʻohana inā pau koke ka ʻiʻini. E hoʻomau a hoʻomau me ka hāʻawi pio ʻole, he Hawaiʻi mau a mau kākou, a e hoʻomau i ka ʻōlelo a i ka hanauna hou, E Kāpahi Ka Moana I Kai!

E hele aku kākou me ka manaʻo paʻa

E paio aku kākou me ka manaʻo koa

E lanakila kākou me ka manaʻo pono

A e kūpaʻa kākou me ka wiwo ʻole

Mahalo

Haʻiʻōlelo a Hāweoʻula Mākaʻimoku:

Mai ka piʻina a ka lā i haʻehaʻe, a i ka mole ʻolu o Lehua, aloha mai nā kūpuna, nā mākua, nā hoahānau, a me nā lālā ʻohana, aloha. I kela me kēia makahiki, hīmeni ʻia ke mele ʻo Kulāiwi e nā haumana, nā kumu, nā limahana, a me nā lala o ke aukahi hoʻōla ʻōlelo Hawaiʻi. ʻO kēia mele he hoʻomanaʻo ia no kākou nā kupa ʻo Hawaiʻi i ko kākou moʻokūʻauhau, ko kākou ʻaina, a me ko kākou pikoʻu Hawaiʻi. Kū hōʻailona kēia mele i ka nui hana a ka ʻohana i molia ai i mea e puka lanakila ka lāhui Hawaiʻi. I mea e hōʻea ai kākou i ia puka lanakila ʻana ua pono ka lāhui e alu like a kōkua aku i kekahi kekahi. I kēia mau lā noʻonoʻo ia ke kōkua ma ke ʻano he nāwaliwali akā ma ke kuanaʻike Hawaiʻi o ia hiki ke noi i ke kōkua he mākau ia e haʻaheo ai ke kanaka.