Aloha pumehana iā ʻoukou pākahi a pau e ka ʻohana Nāwahī! Eia nō wau ʻo Kaʻimi Galima-Elvena o ka papa alakaʻi o ka makahiki 2023. Aia nō wau ma ka papahana huʻeaʻo ma ʻImiloa, ʻo ia hoʻi ka papahana A Hua He Inoa. He ʻumi mākou ma ia papahana huʻeaʻo i komo pū ma ka haku ʻana he mau inoa no ka hoʻokūkū ʻo NameExoWorlds 2022. Ua haku ʻia he pūʻulu inoa no kekahi hōkū a me kona hōkūhele i ʻimi ʻia ma waho o ko kākou poe lā ponoʻī ma ka hoʻohana ʻana i nā ʻohenānā ma Maunakea ala. ʻO Kawelo a me Leimakua nā inoa i haku ʻia e māua ʻo Kahaukepa ʻAipia-Peters ma ia pūʻulu inoa i haku ʻia ma ka hana huʻeaʻo. Ua hui pū kekahi kōmike o nā loea ʻōlelo Hawaiʻi a me nā kānaka ʻepekema hana ma Maunakea a koho ʻia ʻo Kawelo a me Leimakua no ka manaʻo pili ʻohana a me ka mea nui o ka puke ʻo He Moʻolelo Hiwahiwa o Kawelo ma ka moʻomeheu Hawaiʻi. Pili pū kēia mau inoa me ka haʻawina waiwai aʻu i ʻike ai ma kēia hana haku inoa, ʻo ia hoʻi ka ʻimi ʻana i mau ala e mālama ai i ka pilina maikaʻi kekahi me kekahi. Ua lilo ia hana he pahuhopu e hoʻokō ai ma ke ʻano he pūʻulu, no laila, he hana kēia e noʻonoʻo ʻia no ka nui poʻe a ʻaʻole no ke kanaka hoʻokahi wale nō. Ua komo nā ʻelele a pau o ka papahana huʻeaʻo ma ka haku inoa ʻana me ka manaʻo e pōmaikaʻi ai ʻo Hawaiʻi a me nā mea waiwai a pau e ʻike ʻia ma ʻaneʻi e like me ka ʻāina, ka moʻomeheu, a me ke kaiaulu. He pōmaikaʻi nō ka loaʻa mai he pōʻaiapili e komo ai wau a me koʻu mau hoa ma kekahi papahana ʻImiloa. Ua pā maikaʻi maoli nō wau i ke kula ʻia ma Nāwahī, ʻoiai, ua makana ʻia mai kekahi mau pōmaikaʻi, e like hoʻi me kēia hana huʻeaʻo, i loaʻa ʻole ai nā haumāna ma nā kula aupuni maʻamau o Hawaiʻi nei.
Na Kaʻimi Galima-Elvena
ʻO ka haʻawina nui a māua ʻo Kaʻimi Galima-Elvena i ʻike ai ma kēia hana ʻo ka hāpai ʻana i kēia inoa ʻo Kaweloleimakua, ʻo ia ke koʻikoʻi o ka mālama a me ka hoʻōla ʻana i ka ʻike o nā kūpuna a me ka hāpai ʻana i kekahi manaʻo no kēia mua aku. He waiwai nui kēia iā māua, ʻoiai, ma loko o nā hana a me nā haʻawina o kēia, ʻo ia kahi e aʻo a e kālailai ai nā hanauna hou i mea e pōmaikaʻi ai ka lāhui Hawaiʻi. Ma loko pū o kēia haʻawina nui, ua ʻike māua i ka ulu o ko māua kuanaʻike a me ko māua kālainoʻonoʻo no nā pōʻaiapili like ʻole ma ka nalu ʻana ma loko o nā moʻolelo kahiko no Hawaiʻi nei. Ua pā māua i ka waiwai o ke kula ʻia ma Nāwahī ma muli o ka paʻa o kekahi kahua no ka ʻike kuʻuna, Ke Kumu Honua Mauli Ola a me ka ʻike no kā kākou kumu hoʻohālike, ʻo Iosepa Kahoʻoluhi Nāwahīokalaniʻōpuʻu. ʻO kekahi ala i pā ai māua i ke kula ʻia ma Nāwahī, ʻo ia no ka hāpai ʻia no ke koʻikoʻi o ka hoʻi ʻana i kahi i hoʻomaka ai, ʻoiai, no ʻaneʻi ko kākou ola. E like hoʻi me kēia ʻōlelo kaulana o kēia kahua kula nei, he koʻikoʻi ko māua ʻo Kaʻimi ʻimi mau ana i ke ola o ka ʻōlelo ma nā pōʻaiapili like ʻole o ke ola, a he koʻikoʻi ko kākou e ka ʻohana Nāwahī ke kaʻana a me ka hoʻolaha aku i ka ʻike o nā kūpuna i mea e noke ai nā hanauna hou o ka lāhui Hawaiʻi.
Na Kahaukepa ʻAipia-Peters