Ke Kula 'O Nāwahīokalani'ōpuʻu Iki

Skip to main content
Mobile Menu

Pāhana Pena Paia

No kaʻu Pāhana Papa 12, ua noiʻi au e pili ana i ka pāheona a ua kālele kikoʻī au ma luna o nā kiʻipaiākea a me nā helu paia a pehea e pā ai ke kaiaulu a me nā lāhui a puni i ia mau mea. I mea e ʻike ai ka hua o kēlā, ua hoʻoholo au e pena i kiʻipaiākea ma Ke Kula ʻO Nāwahīokalaniʻōpuʻu, akā i mea e hōʻea ai au i kēia hopena ʻo ka paʻa o ke kiʻi ma ka paia, ua nui nā kiʻinahana i pono e hana ʻia.

            E like me nā mea a pau e hana ʻia ma kekahi kula, pono e noi. Ua haku au i leka i ka Papa Alakaʻi o ka ʻAha Pūnana Leo e hōʻike ana i koʻu mau manaʻo no ke kiʻi. Ua wae ʻia ia mau manaʻo a ua hoʻoholo lākou a me ka Papa Alakaʻi o Ke Kula ʻO Nāwahīokalaniʻōpuʻu ua kūpono ʻo ke kiʻi o Ka Wai A Kāne iā lākou. Ua ʻāpono ʻia me ka manaʻo, he wahi kūpono ia kiʻi no Puna nei ʻoiai nui ka ua, “Ka Wai A Kāne” hoʻi a oli mākou i ia mele i kēlā me kēia lā.

            Ma hope o ka ʻāpono ʻia, ua hoʻomākaukau au e ʻimi i kanaka aʻoaʻo e aʻoaʻo mai iaʻu no ka pena ʻana penei i mea e kō ai kaʻu pahuhopu. Ua kōkua mai ʻo Mele Murals mā iaʻu akā ma hope o kekahi hihia, ua hoka au. ʻO ka ʻoiaiʻiʻo, ua manaʻo wau ʻaʻole i hiki ke kō ia pāhana me ka ʻole o Mele Murals mā, akā me ke kōkua a me ke kākoʻo o ka poʻe o koʻu ola, ua hoʻolauna ʻia au iā Kanoa Castro, nāna i lilo i kaʻu kanaka aʻoaʻo no kēia pāhana. Ua kūkākūkā māua no ka manaʻo o ke mele a ua haku ʻia he kiʻi o koʻu manaʻo ponoʻī o Ka Wai A Kāne. Ua ʻimi au i ka loaʻa o nā lako pena mai nā pāʻoihana e laʻa hoʻi me Home Depot, Ace Hardware, Walmart a me HPM, a na ke kula i hoʻolako mai ka meaʻai na nā kānaka i pena pū ai me aʻu.

            Ma loko o ʻekolu lā i paʻa ke kiʻi paiākea iā mākou. Ua nui nā ālaina. ʻAʻole i lawa kekahi waihoʻoluʻu o ka pena, ua loli ke kiʻi i wānana mua ʻia he mau manawa a ua heleleʻi mai ka ua ma ka wā a mākou i pena ai, akā ʻaʻole mākou i hāʻawi pio. Ua kū mākou ma nā wā i pā ikaika mai ai ka lā a me nā wā i heleleʻi mai ai ka ua. Ma o ke alu like ʻana a me ka paʻu ʻana i kō ai ke kiʻipaiākea e kū nei i kēia manawa. Pēlā e lanakila ai ka haumāna Nāwahī.